Inkuru irambuye

02.12.2016

Minitiri w’Intebe yibukije Intore z’Imbamburiramihigo kugira Indangagaciro Nyarwanda


Kuwa 27 Ugushyingo 2016 ubwo hasozwaga Itorero ry’Abayobozi b’Amashami mu Nzego zose za Leta, Itorero ryiswe IMBAMBURIRAMIHIGO, Minisitiri w’Intebe, Anastase Murekezi, yibukije abayobozi b’amashami ko bafite inshingano yo gutanga serivisi nziza ku baturage, anashimangira ko bagomba gucunga neza ibya Leta kandi ntibatume ibintu bidafututse bibanyura imbere ngo bikomeze mu buyobozi bwo hejuru.
Muri uyu muhango wo gusoza Itorero ry’Imbamburiramihigo wari wabereye muri Stade Kamena mu Mujyi wa Huye, Minisitiri w’Intebe Anastase Murekezi yabwiye Imbamburiramihigo 786 zari zisoje Itorero, ko Iterambere ry’Igihugu rizaturuka kuri bo.
Minisitiri w’Intebe yavuze ko Perezida Kagame yamutumye kubashimira akazi keza bakora n’ubwitange bagira mu gushyira mu bikorwa Gahunda za Leta.
Murekezi yabasabye kuba umusemburo w’igenamigambi rinoze kandi rigamije impinduka mu Cyerekezo cya 2050, kwihuta mu kazi no kunoza ibyo bakora no guharanira Ubumwe bw’Abanyarwanda.
Minisitiri w’Intebe yagize ati “Mumaze iminsi icumi muri mu Itorero, hari byinshi mwahigiye birimo Indangagaciro na kirazira by’umuco nyarwanda, icyo Abanyarwanda tubategerejeho ni ugushyira mu bikorwa, imihigo yose mwahize. Muzarusheho kugira uruhare mu gutegura no gushyira mu bikorwa Politiki na Gahunda bya Leta bigamije kuzana impinduka nziza mu Baturage”.
Minisitiri w’Intebe kandi yabasabye kwirinda ruswa, kugira ubupfura n’ubudakemwa mu mikorere no mu myitwarire mu kazi.
Minisitiri w’Intebe Anastase Murekezi yashimangiye ko abo bayobozi b’amashami aribo kiraro gikomeye gihuza abayobozi bakuru, abakozi, n’abaturage.
Minisitiri w’abakozi ba Leta n’Umurimo Judith Uwizeye, yavuze ko gutanga Serivisi zishingiye ku muturage bizagerwaho kubera uruhare izi ntore zizabigiramo, zirangwa no kuba nkore neza bandebereho.
Ati “Imikorere yanyu y’ubutore si iyo mugaragaza hano, izanagaragarire no mu kazi. Muzabigaragaze muba Imbamburiramihigo; muharanira kuba ku isonga mu byo mukora; muba ba rudacogora ku rugamba ruharanira ineza y’Umunyarwanda; mube abatoza b’umurimo unoze; mube ba nkore neza bandebereho kandi mube ku isonga mu kubaka u Rwanda rushya n’iterambere rya Afurika.’’
Iri torero ryatangiye kuwa kuwa 18 Ugushyingo, rigamije kubaka indangagaciro z’umuco nyarwanda mu bayobozi b’amashami no kubongerera ubumenyingiro bwo kuyobora, ku nsanganyamatsiko igira iti “Gutanga Serivisi zishingiye ku Muturage ni Intego Duhuriyeho”.
Iri torero ryitabiriwe n’abayobozi 786 barimo abagabo 630 n’abagore 156, bafite uruhare runini mu itegurwa rya za politiki, amategeko no kubishyira mu bikorwa.


Copyright ©2017 MIFOTRA, All Rights Reserved