Minisitiri w’Abakozi ba Leta n’Umurimo yitabiriye umuhango wo gutaha ibyumba by’amashuri muri Nyarugenge
08.01.2018

Minisitiri w’Abakozi ba Leta n’Umurimo yitabiriye umuhango wo gutaha ibyumba by’amashuri muri Nyarugenge


Kuwa 05 Mutarama 2018 Minisitiri w’Abakozi ba Leta n’Umurimo; Hon Rwanyindo Kayirangwa Fanfan, ari kumwe na Minisitiri w’Ubutegetsi bw’Igihugu Hon. Francis Kaboneka, Minisitiri w’Uburezi Hon. Dr. Eugene Mutimura, abayobozi b’umujyi wa Kigali, Abayobozi b’Akarere ka Nyarugenge, ndetse n’abayobozi b’Ingabo na Polisi mu Mujyi wa Kigali no mu Karere ka Nyarugenge, n’abandi bayobozi batandukanye mu Nzego za Leta, batashye ibyumba by’amashuri 33 byubatswe mu Karere Ka Nyarugenge, ibyumba byubatswe guhera tariki 15 Nzeli 2017. 

Umuhango wo gutaha ibi byumba by’amashuri wabereye mu kigo cy’amashuri cya Kivugiza giherereye mu Murenge wa Nyamirambo, mu Karere ka Nyarugenge.

Ibi byumba byatashywe muri Nyarugenge, byubatswe ku bufatanye bw' inzego zitandukanye zirimo abaturage b' Akarere ka Nyarugenge, abafatanyabikorwa b’Akarere, Inzego z' umutekano nk’uko byagarutsweho n' Umuyobozi w' Akarere ka Nyarugenge Madamu Kayisime Nzaramba.

Mayor w’Akarere ka Nyarugenge yanagaragaje ko ubwo bufatanye aribwo bwatumye barenza ibyumba byari biteganyijwe kubakwa, kuko Akarere kari kateganyije kubaka ibyumba 25 ariko hakaba harubatswe ibyumba 33, aho yashimiye ababigizemo uruhare bose.

Minisitiri w' Uburezi; Hon. Dr. Eugene Mutimura wari n’Umushyitsi Mukuru muri uyu muhango, yashimiye Akarere ka Nyarugenge kuko kabaye aka mbere mu Mujyi wa Kigali mu gutaha ibi byumba. 

Hon. Rwanyindo Kayirangwa Fanfan; Minisitiri w’Abakozi ba Leta n’Umurimo nawe wari muri uyu muhango, yashimye iki gikorwa cy’indashyikirwa cyakozwe n’Akarere ka Nyarugenge.

Minisitiri w’Abakozi ba Leta n’Umurimo asanzwe agira inama Akarere Ka Nyarugenge ngo karusheho kwesa Imihigo.


Copyright ©2017 MIFOTRA, All Rights Reserved