08.11.2016

Hon. Uwizeye yaganirije Abakozi ba MINALOC indangagaciro ziranga umukozi wa Leta


Uhereye i Buryo: UWIZEYE J. (Minister/MIFOTRA),MUKABARAMBA A. (MoS/MINALOC), UWAMARIYA O. (PS/MINALOC),

Kuva kuwa gatanu tariki 04 Ugushyingo kugera ku cyumweru tariki 06 Ugushyingo 2016, Abakozi ba Minisiteri y’Ubutegetsi bw’Igihugu (MINALOC) n’Inzego za Leta ziyishamikiyeho, bari mu mwiherero w’iminsi itatu muri Golden Tulip Hotel I Nyamata, aho bari bagiye kwiga ku ndangagaciro zikwiriye kuranga umukozi wa Leta no gukunda igihugu, muri uwo mwiherero bakaba baraboneyeho umwanya wo kuganira na Minisitiri w’Abakozi ba Leta n’umurimo, Hon. Uwizeye Judith ku ndangagaciro zikwiriye kuranga umukozi wa Leta, aho Minisitiri Uwizeye wabibukije ko gukorera Leta ari ishema, ndetse umukozi wa Leta akwiriye kurangwa no gutanga serivisi nziza.
Minisitiri w’abakozi ba Leta n’Umurimo, yababwiye ko ibikwiye kuranga imikorere inoze ari: Kugaragaza ubushobozi mu byo umukozi akora (Professionalism), Imikorere myiza itanga icyizere, Imikoranire myiza n'abandi mu guhanahana amakuru (team work & communication), Kubazwa no Kugaragaza ibyakozwe neza (accountability), Guhanga udushya (Innovation), Kudakoresha umwanya w'akazi mu nyungu zawe, Gukora umurimo unoze, Guharanira kugera ku ntego, Kureba kure no Guharanira gutanga ibisubizo ku bibazo by'abaturage.
Minisitiri Uwizeye yibukije abakozi ba MINALOC n’Ibigo biyishamikiyeho, ko ntawukwiye gukorera ku ijisho, kuko ibyo bakora baba bikorera kandi biyubakira Igihugu cyabo.
Yagize ati “Ibikwiye kwitabwaho mu gutanga serivisi nziza ni ibi bikurikira: Kwihutisha akazi, Ubwitange no Gukunda akazi, ibyo nimubikurikiza bizatuma mukora umurimo unoze.”
Nyuma y’ikiganiro kirambuye bagiranye na Minisitiri w’Abakozi ba Leta n’Umurimo, Abakozi ba MINALOC n’Inzego ziyishamikiyeho, bagaragaje kunyurwa n’ibyo babwiwe, ndetse bavuga ko bakuye isomo rikomeye mu masomo bahawe kandi ayo masomo agiye gutuma bahindura imikorere mu kazi ka buri munsi.


Copyright ©2017 MIFOTRA, All Rights Reserved