News Details

07.12.2016

Ikigo cya Musanze kizafasha abantu mu kubona akazi cyatashywe ku mugaragaro


Kuri uyu wa kabiri tariki 06 Ukuboza 2016, Minisitiri w’Abakozi ba Leta n’umurimo Judith Uwizeye, aherekejwe n’abandi bashyitsi bakuru barimo Guverineri w’Intara y’Amajyaruguru Claude Musabyimana ndetse n’Umuyobozi w’Akarere ka Musanze Habyalimana Jean Damascene bari kumwe kandi n’abandi bayobozi batandukanye barimo ab’Inzego z’Umutekano ndetse n’abandi Bafatanyabikorwa, batashye ikigo cya Musanze kizafasha urubiruko n’abagore kubona imirimo.
Mu ijambo rye, Minisitiri w’Abakozi ba Leta n’umurimo yibukije abari bitabiriye uwo muhango, ko igikorwa cyo guhanga imirimo kireba buri wese mu Nzego zitandukanye haba iza Leta, iz’Abikorera ndetse na Sosiyete Sivile, bityo bose bakwiriye kubigiramo uruhare ngo bateze Igihugu imbere.
Minisitiri kandi yashimiye Intara y’Amajyaruguru ndetse n’Ubuyobozi bw’Akarere ka Musanze by’umwihariko, kubera iki kigo (Musanze Employment Service Centre), avuga kizafasha urubyiruko n’Abagore kubona imirimo.
Yagize ati “Iki kigo kije gikurikira ikindi kigo nk’iki kiri I Kigali (Kigali Employment Services Centre) cyatangijwe muri 2013, turifuza ko ibigo nk’ibi bifasha urubyiruko n’Abagore kubona imirimo bigera mu Rwanda hose, cyane cyane ko ibigo nk’ibi bizajya bitanga amakuru arebana n’isoko ry’umurimo mu Rwanda, bizafasha kandi gutegura abakeneye kwinjira ku isoko ry’umurimo ndetse bibahuza n’abakoresha, iki kigo ni kimwe mu ngamba zashyizweho mu rwego rwo gufasha urubyiruko kubona imirimo, akaba ariyo mpamvu tubasaba kukibyaza umusaruro.”
Guverineri w’Amajyaruguru Musabyimana Claude ndetse n’Umuyobozi w’Akarere ka Musanze Habyalimana Jean Damascene, bose mu ijambo ryabo bashimiye Minisiteri y’Abakozi ba Leta n’Umurimo kuba yaratekereje gushyira iki kigo I Musanze, ndetse bizeza ubufatanye mu kuzagiteza imbere.
Ibarura ry’ingo rya 4 rya 2013/2014 (EICV 4) ryerekanye ko ihangwa ry’imirimo mishya idashingiye ku buhinzi ryavuye ku mirimo 104,000 bigera ku 146,000 ugereranyije nk’uko byari bihagaze 2010/2011.
Gahunda ya Kora wIgire (National Employment Program) yashyizweho kugira ngo izafashe mu guhanga byibuze imirimo 200,000 itari ubuhinzi.


Top Management

Hon.Minister
Judith Uwizeye
Permanent Secretary
Samuel MULINDWA
D.G Public Service Mgt & Development
Comfort MBABAZI