27.09.2017

Ijambo rya Nyakubahwa Minisitiri w’Intebe; Dr. Edouard Ngirente imbere y’Inteko Ishinga Amategeko kuri Gahunda ya Guverinoma 2017-2024


Ijambo rya Nyakubahwa Minisitiri w’Intebe; Dr. Edouard Ngirente imbere y’Inteko Ishinga Amategeko kuri Gahunda ya Guverinoma 2017-2024

Kigali, ku wa 26/09/2017

 Nyakubahwa Perezida wa Sena,

 Nyakubahwa Perezida w’Umutwe w’Abadepite,

 Ba Nyakubahwa ba Visi Perezida b’Imitwe yombi,

 Ba Nyakubahwa Basenateri,

 Ba Nyakubahwa Badepite,

1. Nk’uko biteganywa n’Ingingo ya 119 y’Itegeko Nshinga rya

Repubulika y’u Rwanda ryo mu 2003 ryavuguruwe mu 2015,

Minisitiri w’Intebe afite inshingano yo gushyikiriza Inteko Ishinga

Amategeko Gahunda ya Guverinoma, bitarenze iminsi mirongo itatu

(30) uhereye igihe yatangiriye imirimo ye. Mu izina ry’abagize

Guverinoma no mu izina ryanjye bwite, mbashimiye uyu mwanya

mumpaye kugira ngo mbagezeho Gahunda ya Guverinoma

y’imyaka 7, 2017-2024 (Seven Years’ Government Programme:

National Strategy for Transformation, NST 1).

 

2. Mbere yo kubagezaho iyi Gahunda, ndagira ngo twongere

dushimire Nyakubahwa Paul Kagame, Perezida wa Repubulika y’u

Rwanda wongeye gutorwa n’Abanyarwanda kugira ngo akomeze

kuyobora u Rwanda muri iyi myaka irindwi iri imbere. Icyizere

Abanyarwanda twamugiriye turi benshi, gishingiye ku bikorwa

byinshi bishimishije yatugejejeho mu byiciro binyuranye by’ubuzima

bw’Igihugu. Ibi bikaba bidutera ishema, bikaduha n’imbaraga z’uko

iyi Gahunda y’imyaka irindwi ngiye kubagezaho izashyirwa mu

bikorwa neza.

 

3. Munyemerere nanone mushimire icyizere gikomeye yangiriye,

ubwo ku itariki ya 30/08/2017 yangiraga Minisitiri w’Intebe w’u

Rwanda. Nkaba musezeranya ko icyo cyizere yangiriye ari igihango

gikomeye ntazigera ntatira.

 Nyakubahwa Perezida wa Sena,

 Nyakubahwa Perezida w’Umutwe w’Abadepite,

 Ba Nyakubahwa ba Visi Perezida b’Imitwe yombi,

 Ba Nyakubahwa Basenateri,

 Ba Nyakubahwa Badepite,

4. Iyi gahunda ya Guverinoma y’imyaka 7 (2017-2024), igamije

kwihutisha iterambere rirambye, kandi rigera kuri bose, rishingiye

ku bufatanye bw’Inzego zinyuranye: iza Leta, Abikorera, Imiryango

itari iya Leta, Sosiyete Sivile, Amadini n’Amatorero, ndetse

n’abaturage ubwabo.

 

5. Mu gutegura iyi Gahunda hashingiwe kuri ibi bikurikira:

 Imigambi y’Umuryango FPR-INKOTANYI 2017-2024, ari na wo

watsinze amatora ya Perezida wa Repubulika y’u Rwanda;

 Ibikorwa byihariye Nyakubahwa Paul Kagame yasezeranyije

Abanyarwanda, hagati y’itariki ya 14/7/2017 n’iya 2/8/2017,

ubwo yari mu bikorwa byo kwiyamamariza kongera kuba Perezida

wa Repubulika y’u Rwanda;

 Imirongo migari yatanzwe na Nyakubahwa Perezida wa

Repubulika mu ijambo yavuze arahirira kuyobora u Rwanda

kuwa 18 Kanama, 2017; n’iyo yatanze ubwo yakiraga indahiro

z’abagize Guverinoma;

 Ibikorwa by’umwaka wa nyuma wa Gahunda

y’Imbaturabukungu ya 2 (EDPRS 2: 2013-2018), ibiteganyijwe

gukorwa mu myaka itatu isigaye ngo tugere mu Cyerekezo 2020

(Vision 2020), ndetse n’Imirongo migari y’Icyerekezo 2050 (Vision

2050);

 N’ibindi bipimo byumvikanyweho n’Imiryango mpuzamahanga

itandukanye u Rwanda rurimo: Gahunda y’Intego z’Iterambere

rirambye (SDGs 2030), Gahunda y’Umuryango w’Ubumwe bwa

Afurika 2063 na Gahunda z’Icyerekezo 2050 cy’Umuryango wa

Afurika y’Iburasirazuba/EAC.

IBIKORWA BY’INGENZI BIGIZE GAHUNDA YA GUVERINOMA

 Nyakubahwa Perezida wa Sena,

 Nyakubahwa Perezida w’Umutwe w’Abadepite,

 Ba Nyakubahwa ba Visi Perezida b’Imitwe yombi,

 Ba Nyakubahwa Basenateri,

 Ba Nyakubahwa Badepite,

6. Ibikorwa by’ingezi bigize Gahunda ya Guverinoma y’imyaka 7

(2017-2024) bikubiye mu nkingi eshatu arizo: Ubukungu, Imibereho

myiza y’Abaturage n’Imiyoborere.

MU RWEGO RW’UBUKUNGU

7. Intego ni ukurushaho kwihutisha iterambere ry’ubukungu

bushingiye ku ishoramari ry’Abikorera, ku bumenyi no ku

mutungo kamere w’Igihugu cyacu (Economic growth and

development founded on the Private Sector, knowledge and Rwanda’s

Natural Resources) kandi butagira uwo buheza.

Kugira ngo iyi ntego izagerweho, hazakorwa ibikorwa by’ingenzi

bikurikira:

I. Hazahangwa imirimo mishya ibyara inyungu igera nibura

kuri 1.500.000.

Muri uru rwego:

a. Ibyiciro by’imirimo byagaragaje ko byihutisha iterambere kandi

bigatanga n’akazi ku bantu benshi, bizarushaho gutezwa

imbere. Bimwe muri byo ni:

 Gutunganya ibikomoka ku buhinzi n’ubworozi (Agro -

processing);

 Ubuhinzi bw’indabo, imboga, n’imbuto (Horticulture);

 Inganda (Manufacturing);

 Gucukura no gutunganya amabuye y’agaciro (Value

addition of minerals);

 Ubwubatsi;

 Ubukerarugendo harimo no guteza imbere gutwara

abantu n’ibintu mu kirere no ku butaka;

 Serivisi zishingiye ku buhanga butandukanye

(Knowledge-based services);

 Ubugeni n’ubukorikori (Creative Arts).

b. Urubyiruko n’abagore bazongererwa ubumenyi bwo kwihangira

imirimo. Ibi bizabafasha kurushaho gukorana neza n’Ibigo

by’Imari hagamijwe guteza imbere ibikorwa byabo;

c. Mu rwego rwo gushyira mu bikorwa Gahunda yo gufasha

abataratangira akazi kwimenyereza umurimo, hazongerwa

imbaraga mu gukorana n’ibigo by’Abikorera;

d. Hazongerwa umubare w’abize ubumenyingiro (TVET) buhuzwe

n’ibikenewe ku isoko ry’umurimo;

e. Hazanozwa igenamigambi ryo gutegura imirimo yose yo mu

rwego rw’ubukungu kandi hongerwe imbaraga mu guhuza no

gukurikirana ishyirwa mu bikorwa rya Gahunda y’Igihugu ya

Kora Wigire (National Employment Programme/NEP);

f. Muri buri mudugudu, hazashyirwaho gahunda yo guteza imbere

guhanga imirimo hashyirwaho nibura umushinga umwe

w’icyitegererezo ubyara inyungu.

II. Igikorwa cya kabiri ni ukwihutisha iterambere rirambye

ry’imigi hagamijwe guteza imbere ubukungu n’imibereho myiza

y’abaturage.

Muri uru rwego hazakorwa ibi bikurikira:

8. Hazavugururwa kandi hakurikiranywe ishyirwa mu bikorwa

ry’ibishushanyombonera by’imigi yunganira Kigali (Secondary

cities) n’indi migi. By’umwihariko, hazashyirwaho imishinga yihariye

ijyanye n’umwihariko wa buri mugi kugira ngo irusheho kwihutisha

iterambere ryayo.

9. Ku bufatanye n’Abikorera, ibikoresho by’ubwubatsi bikorerwa

mu Rwanda (Made in Rwanda) bizatezwa imbere kandi byongerwe

kugira ngo ibiciro by’amazu bigabanuke. Ibi bizatuma umubare

w’amazu acirititse arushaho kwiyongera.

10. Hazanozwa serivisi zo gutwara abantu n’ibintu mu migi no mu

cyaro. Bimwe mu bizakorwa ni ukongera inzira zikoreshwa na bisi

zitwarira abagenzi ku gihe kizwi (scheduled bus routes). By’umwihariko,

mu Mujyi wa Kigali, hazashyirwamo inzira zihariye za bisi zitwara

abantu zizaba zifite uburebure bwa Km 22. Ibi bizagabanya igihe

abantu bajyaga bamara bategereje bisi.

11. Ibikorwaremezo bizakomeza gushyirwa ahantu hashya

hateganyirijwe guturwa (new residential zones). Muri uru rwego,

hazahangwa imihanda iri ku burebure bungana na Km 250 ahagenewe

gutuza abantu ndetse hakorwe n’imihanda yo mu migi iri ku burebure

bwa Km 288. Amatara azakomeza kugezwa ku mihanda iduhuza

n’ibindi bihugu ndetse no ku mihanda minini yo mu migi.

III. Igikorwa cya gatatu ni ugushyiraho ingamba zizafasha u

Rwanda kugira umwanya mu ruhando rw’ibihugu bifite ubukungu

bushingiye ku bumenyi (Knowledge-based Economy).

Ibizakorwa muri uru rwego ni ibi bikurira:

12. Mu gice cy’Umujyi wa Kigali cyahariwe imirimo yihariye mu

by’ubukungu/Kigali Special Economic Zone, hazashyirwaho ahantu

hihariye hazafasha Abanyarwanda n’abanyamahanga bafite impano

zihariye kurushaho guhanga ibishya, Kigali Innovation City.

13. Hazashyirwaho Ikigega kigamije guteza imbere imishinga

y’ikoranabuhanga no guhanga ibishya (Innovation Fund).

14. Urubyiruko ruzafashwa kurushaho kugira ubushobozi

n’ubumenyi bwo gukoresha ikoranabuhanga.

15. Hazashyirwa imbaraga mu kubyaza umusaruro Ibigo

by’icyitegererezo mu bumenyi, ikoranabuhanga no guhanga ibishya

(Centers of Excellence). Hazashyirwaho kandi n’ibindi bigo bishya.

Hazanozwa ubufatanye bugamije guteza imbere ikoreshwa

ry’ubumenyi bwihariye burimo n’ubwo mu rwego bw’ubuzima,

uburezi, inganda n’umutekano w’ikoranabuhanga (Cyber security).

16. Hazongerwa imbaraga mu guteza imbere ubushakashatsi

butanga ibisubizo ku bibazo by’imibereho y’abaturage n’ubukungu

bw’Igihugu. Umwihariko uzahabwa ubushakashatsi bushingiye ku

ikoranabuhanga ryo guteza imbere inganda.

IV. Igikorwa cya kane ni uguteza imbere inganda na serivisi,

hagamijwe kongera ibyo twohereza mu mahanga (Good and

Services) kugira ngo bizagere nibura kuri 17% buri mwaka.

Hazakorwa ibi bikurikira:

17. Umusaruro w’ibikomoka ku buhinzi uzarushaho kongererwa

agaciro kugira ngo twongere ingano y’ibyo u Rwanda rwohereza ku

masoko mpuzamahanga:

a. Ikigero cy’ikawa yongerewe agaciro (Fully washed coffee) kizava

kuri 54% kigere kuri 80%;

b. Ubuhinzi bw’icyayi buzarushaho gutezwa imbere.

Hazanihutishwa kubaka inganda nshya z’icyayi mu duce

cyeramo;

c. Ku bufatanye n’abahinzi n’Abikorera binyujijwe mu kunoza

amasezerano basanzwe bagirana, inganda zitunganya ibituruka

ku musaruro w’ubuhinzi zizafashwa kubona umusaruro

uhagije;

d. Hazongerwa umusaruro w’ibikomoka ku buhinzi byoherezwa

hanze (Traditional and non-traditional export crops).

18. Ku bufatanye n’Abikorera, Gahunda yo gushyigikira

ibikorerwa mu Rwanda (Made in Rwanda), izakomeza gutezwa

imbere. Ibi bizatuma muri iyi myaka irindwi u Rwanda ruzazigama

nibura miliyoni 400 USD ku byo rwatumizaga mu mahanga.

19. Hazubakwa inganda nshya ndetse n’izisanzwe

zizongererwe ubushobozi. Zimwe muri izi nganda ni:

 Uruganda rukora imiti;

 Uruganda rukora inzitiramibu;

 Uruganda rukora ifumbire;

 Inganda zikora ibikoresho by’ubwubatsi nk’amabati, amakaro

n’ibyuma;

 N’uruganda rukora ibyo gupfunyikamo ibicuruzwa (packaging

materials).

 

20. Hazashyirwaho ingamba zizatuma uruhare rwa serivisi mu

byo u Rwanda rwohereza hanze rwiyongera

Bimwe mu bizakorwa:

 Ni uguteza imbere serivisi z’ikoranabuhanga ryo mu rwego rwo

hejuru ryifashishwa mu rwego rw’imari; no

 Guteza imbere serivisi zikoresha iya kure zihabwa abakiriya bari

mu mahanga hirya no hino (BPO-Business Process

Outsourcing), serivisi zijyanye n’amategeko; iz’ubwikorezi bwo

mu kirere, mu mazi, ku butaka, n’izindi.

21. Muri iyi myaka irindwi, umusaruro ukomoka mu

bukerarugendo uzikuba kabiri ugere kuri miliyoni 800 USD uvuye

kuri miliyoni 404.

Muri uru rwego hazakorwa ibi bikurikira:

a. Hazashyirwaho ingamba zituma u Rwanda ruba ku isonga mu

bihugu ba mukerarugendo benshi bifuza gusura;

b. Hazongerwa imari ishorwa mu gutunganya ibikorwaremezo

byorohereza ubukerarugendo birimo no gushyira mu bikorwa

igishushanyombonera kigaragaza uko inkengero z’Ikiyaga cya

Kivu zarushaho kubyazwa umusaruro (Kivu Belt Tourism

Master Plan);

c. Serivisi zo kwakira abashyitsi zizarushaho gutezwa imbere

kandi Abikorera bazahabwa amahugurwa azabafasha

kurushaho gutanga serivisi nziza.

22. Urwego rw’ubwikorezi bwo mu kirere buzatezwa imbere.

Bimwe mu by’ingenzi bizakorwa ni:

a. Kongera umubare w’Ibihugu indege ya Rwandair igeramo ku

migabane ya Afurika, Uburayi, Aziya na Amerika;

b. Kurangiza kubaka no gutangira gukoresha igice cya mbere

cy’umushinga w’Ikibuga Mpuzamahanga cy’Indege cya Bugesera

kizaba gifite ubushobozi bwo kwakira abagenzi bangana na

miliyoni 1,7 ku mwaka;

c. Gushyiraho Ikigo cy’Icyitegererezo kizafasha mu kongera

ubumenyi bukenewe mu by’indege;

d. Kongerera ubushobozi Ikibuga cy’Indege cya Kamembe,

kwagura no gusana icya Rubavu.

23. Hazashyirwa mu bikorwa imishinga itandukanye igamije

gukomeza kugabanya ikiguzi cyo gukora ubucuruzi (cost of doing

business) no kubuteza imbere.

Imishinga y’ingenzi izakorwa ni iyi ikurikira:

a.Hazakorwa imihanda ya kaburimbo ihuza Uturere ireshya na

km 800 mu Gihugu cyose harimo:

 Ngoma-Bugesera - Nyanza;

 Base-Kirambo - Butaro-Cyanika;

 Base - Gicumbi-Rukomo - Nyagatare;

 Huye - Kibeho - Munini;

 Kagitumba - Kayonza – Rusumo;

 Kigali - Kicukiro-Ikibuga Mpuzamahanga cy’Indege cya

Bugesera;

 Umuhanda mugari uzengurutse Umujyi wa Kigali (Kigali

Ring road).

b.Mu rwego rwo gufasha abaturage kugeza umusaruro ku isoko,

hazubakwa hanasanwe imihanda y’imihahirano (feeder roads)

ireshya na km 3.000;

c.Hazubakwa imihanda mishya ya kaburimbo ireshya na km 350

mu Mujyi wa Kigali, imigi iwunganira n’indi migi mito;

d. Gahunda yo guhuza u Rwanda n’Ibihugu byo mu Karere

hakoreshejwe imihanda, gariyamoshi izakomeza gushyirwamo

imbaraga;

e.Mu rwego rwo kurushaho guteza imbere ubwikorezi

mpuzamahanga no gufasha ababukora kurushaho kubunoza,

ku bufatanye n’Abikorera, umushinga wo kubaka Icyambu

kidakora ku mazi cya Kigali uzarangizwa kandi icyambu

gitangire gukoreshwa (Kigali Logistics Platform);

f. Mu rwego rwo guteza imbere ubucuruzi n’ibihugu duturanye,

hazongerwa amasoko ya kijyambere ku mipaka ihuza u

Rwanda n’ibyo bihugu (Cross border markets). Ku nkengero

z’Ikiyaga cya Kivu hazubakwa ibyambu bine aribyo: Rusizi,

Nyamasheke, Karongi na Rubavu;

g.Hazashyirwaho ahantu hazafasha abacuruzi b’Abanyarwanda

gukora ubucuruzi mpuzamahanga (Foreign Multi-Services

Centers);

h. Mu Ntara zose hazubakwamo hanatezwe imbere ahantu

hihariye mu by’ubukungu. Igice cy’Umujyi wa Kigali cyahariwe

imirimo yihariye mu by’ubukungu (Kigali Special Economic Zone)

kizagurwa ku buryo muri 2024 kizaba gifite ubushobozi bwo

kwakira amasosiyete y’Abikorera agera kuri 350.

i. Hazongerwa amashanyarazi ndetse n’imiyoboro iyakwirakwiza

mu Gihugu (Transmission lines). Umwihariko uzashyirwa ku

miyoboro igana ahari inganda, udukiriro, amasoko, n’ahandi

hari ibikorwaremezo bihurirwaho n’abantu benshi nk’amashuri

n’amavuriro;

j. Hazongerwa ubushobozi, hanavugururwe Ikigega kigenewe

gufasha abohereza ibicuruzwa hanze (Export Growth Fund).

24. Mu kurushaho guteza imbere urwego rwa mine na kariyeri,

hazakomeza gukorwa ubushakashatsi n’ibikorwa bigamije kugaragaza

ingano n’ubwiza by’umutungo kamere w’Igihugu cyacu. Intego ni uko

muri 2024 tuzaba dufite ubushobozi bwo kohereza mu mahanga

amabuye y’agaciro n’ibiyakomokaho bifite agaciro ka miliyari 1,5 USD

bivuye kuri miliyoni 200 USD turiho muri iki gihe.

25. Amabuye y’agaciro azarushaho gutunganywa no kongererwa

agaciro hagendewe ku bikenewe ku isoko ryo mu gihugu n’iryo

hanze. Abikorera bazakomeza gushishikarizwa gushora imari yabo mu

gucukura no gutunganya amabuye y’agaciro. Abasanzwe bakora

ubucukuzi bwa gakondo bazahabwa ubushobozi binyuze mu

mahugurwa yo gukora ubucukuzi bugezweho.

V. Igikorwa cya gatanu ni ukongera igipimo cyo kuzigama no

kugira u Rwanda isoko rya serivisi z’imari (Financial Services Hub)

hagamijwe guteza imbere ishoramari.

Iby’ingenzi bizakorwa ni ibi bikurikira:

26. U Rwanda ruzaba Ihuriro ryo gutanga serivisi z’imari (Financial

Services Hub). Muri uru rwego, abakora ibijyanye n’imari bazahabwa

amahugurwa ku bumenyi bwihariye kandi abifuza gushora imari

bazarushaho koroherezwa.

27. Kwihutisha ikoreshwa ry’ikoranabuhanga mu kwishyurana,

maze ingano y’amafaranga yishyurwa hakoreshejwe ikoranabuhanga

(value of payments done electronically) ikagera kuri 80% y’umusaruro

mbumbe w’imbere mu Gihugu (GDP) ivuye kuri 42%.

28. Serivisi z’imari zizarushaho kwegerezwa abaturage. Mu 2024,

Abanyarwanda bose bafite imyaka y’ubukure bazaba bashobora

kuzikoresha 100% bavuye kuri 89%.

 

29. Isoko ry’Imari n’Imigabane rizarushaho gutezwa imbere.

30. Hazashyirwa mu bikorwa gahunda yemejwe yo kwizigamira mu

gihe kirekire (Long term saving scheme). Abanyarwanda bo mu ngeri

zose, cyane cyane abakora muri informal sector, bazashishikarizwa

kwitabira ubu bwizigamire kugira ngo bazashobore kubona ibibafasha

mu masaziro (pensiyo) kugeza ubu byahabwaga gusa abakozi bakorera

imishahara. Ubu buryo kandi buzafasha abizigamiye igihe kirekire

kwigurira amacumbi no kwishyura amashuri y’abana; ndetse ayo

mafaranga yose azigamwe afashe no kongera ishoramari mu Gihugu.

VI. Igikorwa cya 6 ni ukuzamura umusaruro w’ubuhinzi

n’ubworozi mu bwinshi no mu bwiza.

Muri uru rwego:

31. Ibikomoka ku buhinzi n’ubworozi bizarushaho kongererwa

agaciro kugira ngo birusheho gutanga umusaruro.

32. Ku bufatanye n’Abikorera, ubucuruzi bw’ibikomoka ku

buhinzi buzakomeza gutezwa imbere. Hazashyirwaho ingamba zo

kuzamura umusaruro, hagamijwe kuwongerera agaciro no kuwugeza

ku isoko.

33. Hazongerwa ubuso bw’ubutaka buhujwe n’ubwuhirwa:

a. Ubutaka bwuhirwa buzava ku buso bungana na hegitari 48.508

zo muri uyu mwaka (2016/2017) bugere kuri hegitari 102.284

muri 2024. Umwihariko uzahabwa ubuhinzi bukorerwa mu

bishanga n’ubukorerwa ku buso buto hakoreshejwe

ikoranabuhanga ridahenze cyane (Small-scale irrigation).

b. Hazatezwa imbere imikoreshereze myiza y’uburyo bushya bwo

kuhira burimo no guteza imbere amakoperative y’abahinzi

n’ay’abakoresha amazi (Water Users Association).

c. Hazongerwa ikoreshwa ry’imashini mu mirimo y’ubuhinzi

(Mechanised farm operations) rive kuri 25% (2017) rigere kuri

50%;

d. Ubuso bw’ubutaka buhingwa nyuma yo guhuzwa buzazamuka

bugere kuri hegitari 980.000 buvuye kuri hegitari 635.603.

34. Abahinga ku butaka buhujwe bazarushaho koroherezwa

kubona imbuto z’indobanure ku buryo muri 2024 bazagera nibura

kuri 75% bavuye kuri 52% (2016).

35. Ikoreshwa ry’ifumbire na ryo rizazamuka rigere kuri kg 75

kuri hegitari imwe rivuye kuri kg 32 kuri hegitari, mu 2016/2017.

36. Ubushakashatsi bwo mu rwego rw’ubuhinzi buzongerwamo

imbaraga. By’umwihariko, hazashakishwa ubundi bwoko bushya

bw’imbuto butanga umusaruro uhagije. Ibi bizatuma izo u Rwanda

rwajyaga rutumiza hanze zizajya zituburirwa imbere mu Gihugu.

37. Hazashyirwaho ingamba zo kongera umusaruro wa bimwe

mu bihingwa byatoranyijwe aribyo: ibigori, ingano, umuceri,

ibishyimbo, ibirayi, imyumbati, soya, urutoki. Izi ngamba zizatuma

umusaruro wajyaga uva kuri hegitari imwe wiyongera ku buryo

bugaragara.

38. Ku bufatanye n’Abikorera, hirya no hino mu Gihugu

hazashyirwaho ahantu ho gutunganya, kongerera agaciro, no

guhunika umusaruro ukomoka ku buhinzi. Hazibandwa cyane ku

bihingwa byatoranyijwe aribyo ibigori, ingano, umuceri, ibirayi,

ibishyimbo, imyumbati, soya, n’ubuhinzi bw’indabyo, imboga

n’imbuto.

39. Hazashyirwaho ingamba zo korohereza ishoramari rya Leta

n’iry’Abikorera ryo mu rwego rwo guhunika imyaka. Ibi

bizagabanya umusaruro wajyaga utakarira mu isarura uve kuri 16%

ugere kuri 5%.

40. Ibigori n’ibishyimbo bihunikwa mu bigega by’Uturere

n’iby’Abikorera bizongerwa kugira ngo bibe byakwitabazwa mu

gihe cy’ibura ry’umusaruro. Bizagera kuri toni 260.052 bivuye kuri

toni 184.814. Ubushobozi bw’ibigega bihunika imyaka na bwo

buzongerwa bugere kuri toni 350.431 buvuye kuri toni 295.495.

41. Hazashyirwaho gahunda zo gufasha aborozi korora

kinyamwuga. Muri uru rwego, hazatezwa imbere ubushakashatsi ku

matungo bugamije kongera umusaruro wayo, ubuvuzi bw’amatungo,

inganda zikora ibiryo by’amatungo, no gutunganya umusaruro uva

ku matungo ku buryo bwujuje ubuziranenge.

42. Gukomeza gahunda yatangiye yo kwegereza amazi amatungo

mu Turere dukunze kwibasirwa n’amapfa no gukangurira aborozi

kubika ubwatsi (forage).

43. Abikorera bazashishikarizwa gushora imari yabo mu kubaka

amakusanyirizo y’amata no gushyira mu bikorwa imwe mu

mishinga minini irimo ubworozi bw’amafi, gukora ibiribwa

by’amatungo, umushinga wa Gako uzatanga inyama (Gako Beef

Farm), n’inganda zitunganya impu. 

44. Inguzanyo zitangwa ku mishinga yo mu rwego rw’ubuhinzi

n’ubworozi zizongerwa zigere kuri 10,4% by’inguzanyo zose zivuye

kuri 5,2%.

45. Hazashyirwa imbaraga mu bwishingizi ku bikorwa

by’ubuhinzi n’ubworozi.

VII. Igikorwa cya karindwi ni ugushyiraho ingamba zo gukoresha

neza umutungo kamere kandi tubungabunga ibidukikije hagamijwe

iterambere rirambye.

46. Ku bufatanye n’Abikorera, hazakomeza kunozwa uburyo bwo

gucunga amashyamba no kuyabyaza umusaruro. Intego ni uko

muri 2024, Leta izaba yararangije kwegurira Abikorera icungwa

ry’amwe mu mashyamba yayo ku kigero cya 80% uvuye kuri 5%

tugezeho mu 2017.

47. Amashyamba y’abantu ku giti cyabo na yo azatezwa imbere

kandi abayafite bazashishikarizwa kwibumbira mu mashyirahamwe.

Hazanashyirwaho uburyo bushya bw’ubufatanye hagati ya Leta

n’Abikorera mu guteza imbere urwego rw’amashyamba (Effective PPP

model).

48. Ubuso bw’ubutaka buteyeho ibiti bungana na 30% y’ubutaka

bwose buzabungwabungwa.

49. Umubare w’abaturage bakoresha ibicanwa bikomoka ku biti

uzagabanywa ugere kuri 42% uvuye kuri 83,3%. Kugira ngo ibi

bizagerweho, abaturage bazashishikarizwa gukoresha ubundi buryo

bunyuranye harimo gazi cyane mu migi, biyogazi n’ibindi (alternative

sources of energy).

50. Hazakorwa umushinga wo gukemura ikibazo cy’amazi

aturuka mu birunga n’indi migezi kugira ngo hirindwe ingaruka

zitandukanye yajyaga atera abaturage, ndetse higwe n’uburyo

yabyazwa umusaruro. 

 Nyakubahwa Perezida wa Sena,

 Nyakubahwa Perezida w’Umutwe w’Abadepite,

 Ba Nyakubahwa ba Visi Perezida b’Imitwe yombi,

 Ba Nyakubahwa Basenateri,

 Ba Nyakubahwa Badepite,

INKINGI YA II: IMIBEREHO MYIZA Y’ABATURAGE

51. Muri uyu mwanya ndagira ngo mbagezeho ibikorwa

biteganyijwe mu nkingi ya kabiri irimo ibikorwa bijyanye n’

imibereho myiza y’abaturage.

52. Intego ni ukugira Umunyarwanda ushoboye, ufite ubumenyi,

ubuzima bwiza, kandi ubayeho neza mu muryango utekanye.

Hazibandwa ku bikorwa bitanu by’ingenzi.

I.Igikorwa cya mbere ni ukurushaho gufasha Abanyarwanda bari

mu cyiciro cy’ubukene n’icy’ubukene bukabije gutera imbere no

kwigira.

Kugira ngo ibi bizagerweho hazakorwa ibi bikurikira:

a. Gahunda zisanzwe zunganira abaturage bagikennye kwivana

mu bukene, zizakomeza hagamijwe kubaha umusingi wo

kubafasha kwifasha.

 Mu Gihugu hose, Gahunda ya VUP izibanda ku mirimo

ihabwa abakene bafite imbaraga zo gukora. Umwihariko

uzashyirwa mu korohereza ibyiciro byihariye birimo cyane

cyane abagore bayobora ingo bita ku bana;

 Hazavugururwa uburyo bwari busanzwe butangwamo

imirimo ikorwa muri Gahunda ya VUP ikorerwe cyane mu

bice by’Igihugu bikunze guhura n’ibiza cyangwa amapfa.

b. Hazongerwa imbaraga muri Gahunda ya Girinka

n’iy’Amatungo magufi n’izindi Gahunda zikorerwa ku rwego

rw’Umudugudu zigamije gutuma abaturage bakennye biteza

imbere. Hazanozwa kandi imicungire yazo.

c. Impunzi zitahuka zizakomeza gufashwa kwinjira mu buzima

busanzwe.

II. Igikorwa cya kabiri ni ukurandura imirire mibi.

Hazashyirwa mu bikorwa ingamba zo gukumira no kurwanya

ubwoko bwose bw’imirire mibi butera bwaki no kugwingira.

Muri uru rwego, bimwe mu by’ingenzi bizakorwa ni ibi bikurikira:

a. Hazanozwa ihuzabikorwa rya Gahunda zo kurwanya imirire

mibi, cyane cyane izikorerwa ku rwego rw’Umudugudu harimo

no kwita ku isuku mu bana, iy’ibiribwa, n’iyo mu ngo muri

rusange;

b. Hazakomeza gushyirwa mu bikorwa gahunda zo kwihaza mu

biribwa mu buryo burambye. By’umwihariko, abana bahuye

n’ibibazo bikomoka ku mirire mibi bazakomeza guhabwa ibiryo

bikungahaye ku ntungamubiri. Bazakomeza kandi guhabwa

amata muri Gahunda y’Inkongoro y’Umwana/One Cup of Milk

Per Child;

c. Hazashyirwa imbaraga muri gahunda y’iminsi igihumbi yo

kurwanya imirire mibi n’izo kwita ku babyeyi batwite

zikorerwa ku rwego rw’Umudugudu. Hazanakorwa

ubukangurambaga ku mirire myiza binyuze mu bufatanye

n’amarerero n’ibigo nderabuzima.

III. Igikorwa cya gatatu ni ugukomeza guharanira ko

Abanyarwanda bagira ubuzima bwiza kandi serivisi z’ubuvuzi

zikagera kuri bose.

Hazakorwa ibi bikurikira:

53. Ibitaro bitandukanye bizubakwa, ibindi byagurwe kandi byose

bizashyirwamo ibyangombwa bikwiye. Bimwe mu bitaro birebwa n’iyi

gahunda ni ibya Ruhengeri, Munini, Byumba, Nyabikenke, Masaka,

Gatunda, Gatonde na Muhororo. Imirenge 17 itari ifite ibigo

nderabuzima, izabihabwa kandi hirya no hino mu Gihugu hazubakwa

Poste de Santé nshya 150.

54. Hazakomeza kunozwa ishyirwa mu bikorwa ry’ingamba zo

kugabanya impfu z’abana bato n’ababyeyi bapfa babyara. Ibi

bizatuma igipimo cy’umubare w’ababyeyi bapfa babyara kigabanuka

kigere ku 126/100.000 kivuye kuri 210/100.000. Igipimo cy’umubare

w’abana bapfa batarageza ku myaka itanu na cyo kizagabanuka kigere

kuri 35/1.000 kivuye kuri 50/1.000. Ingamba zo gukingira abana bose

na zo zizakomeza kwitabwaho kandi n’umubare w’abagore babyarira

kwa muganga uzazamuka ugere hejuru ya 90%.

55. Hazongerwa umubare n’ubushobozi bw’abakozi bo mu rwego

rw’ubuzima barimo abaganga (general practitioners), abaganga

b’inzobere (specialists), abaforomo n’ababyaza (nurses and midwives),

n’abandi bakozi b’ibitaro (administrators). Ibi bizagabanya igipimo

cy’umubare w’abarwayi ku muganga umwe, kizava ku 10.055 kigere ku

7.000. Igipimo cy’umubare w’abarwayi ku muforomo umwe na cyo

kizagabanuka kive ku 1.142 kigere kuri 800. Igipimo cy’umubare

w’abagore ku mubyaza kizagera ku 2.500 kivuye ku bagore 4.037.

56. Ku bufatanye n’Abikorera, hazashyirwaho Ibigo by’Ubuzima

by’Icyitegererezo bizajya bivura zimwe mu ndwara zitandura (Non

Communicable Diseases) zajyaga zituma Abanyarwanda batari bake bajya

kuzivuriza hanze kandi bibahenze.

57. Hazanozwa uburyo bwo kubona amafaranga akoreshwa mu rwego

rw’ubuvuzi. Bumwe muri ubu buryo ni ukunoza ubufatanye hagati ya

Leta n’Abikorera bo mu rwego rw’ubuzima, no gushyiraho uburyo

burambye bwo gutanga imisanzu y’ubwishingizi bw’ubuzima (Community

Based Health Insurance).

58. Hazatezwa imbere inganda zikora imiti n’ibikoresho byo kwa

muganga kandi hashyirwe imbaraga mu bushakashatsi bujyanye

n’ubuvuzi.

59. Hazatezwa imbere umuco wo kwirinda indwara muri rusange, no

gukumira indwara z’ibyorezo n’izitandura.

60. Hazongerwa imbaraga mu gukumira no kurwanya ikoreshwa

ry’ibiyobyabwenge mu byiciro byose by’abaturage cyane cyane mu

rubyiruko.

61. Hazongerwa imbaraga mu kwigisha ubuzima bw’imyororokere

hagamijwe guca inda zitateganyijwe n’indwara zandurira mu myanya

ndangagitsina hibandwa ku rubyiruko. Abanyarwanda bazakangurirwa

gahunda yo kuboneza urubyaro. Umubare w’ababukoresha uzazamuka

ugere nibura kuri 60% uvuye kuri 48%.

IV. Igikorwa cya kane cy’ingenzi ni ukwita ku burezi bufite ireme

kandi bugera kuri bose. Ibi bizatuma abana b’u Rwanda bahabwa uburezi

bw’ibanze bufatika.

Hazakorwa ibi bikurikira:

62. Hazongerwa imbaraga mu mashuri y’incuke. Ibi bizatuma

umubare wabo uzamuka ugere kuri 45% uvuye kuri 17,5%. 

63. Ireme ry’uburezi rizitabwaho mu byiciro byose by’amashuri.

Hazakorwa ibi bikurikira:

 Ababyeyi bazashishikarizwa kurushaho kugira uruhare mu

myigire myiza y’abana babo;

 Kongera umubare w’abarimu babifitiye ubushobozi;

 Kuzamura ubushobozi n’imibereho myiza ya mwarimu;

 Kuvugurura no kongera ibyumba by’amashuri no kubigezamo

ibikorwaremezo bya ngombwa; no

 Kunoza ikoreshwa ry’ikonabuhanga mu mashuri no gushaka

imfashanyigisho zijyanye n’igihe.

64. Hazashyirwaho ingamba zifasha abafite ubumuga

butandukanye gutangira no gukomeza amashuri yo mu byiciro byose

by’uburezi.

65. Amashuri y’imyuga n’ubumenyingiro (TVET) azarushaho

gutezwa imbere ku buryo umubare w’abayigamo uzagera kuri 60%

y’abanyeshuri bose barangije icyiciro rusange uvuye kuri 46,4%.

66. Mu byiciro byose by’amashuri, amasomo ya siyansi,

ikoranabuhanga, Engineering n’imibare (STEM) azarushaho

kwitabwaho.

Bimwe mu bizakorwa ni:

 Kumenya hakiri kare abana bafite ubuhanga bwihariye mu

masomo atandukanye, cyane aya siyansi n’ikoranabuhanga,

kugira ngo barusheho gufashwa guteza imbere impano zabo.

 Kongerera ubushobozi ibigo bikora ubushakashatsi bujyanye na

siyansi;

 Kongera umubare w’abanyeshuri biga amasomo ya siyansi mu

mashuri makuru ya Leta bakazagera kuri 80% bavuye kuri 44%

bo muri 2016.

67. Hazashyirwa ingufu mu gushyira mu bikorwa ingamba zo

gushishikariza abana kudata amashuri. Zimwe mu ngamba zizatuma

ibi bigerwaho ni ugushyira muri buri Kagari Abajyanama b’uburezi no

kunoza imicungire y’amashuri. Ababyeyi na bo bazakomeza

gushishikarizwa kwita k’uburere bw’abana babo. Ibi bizazamura

umubare w’abana barangiza ibyiciro by’amashuri atandukanye ku

buryo umubare w’abimukira mu mashuri yisumbuye uzagera kuri

92,4% uvuye kuri 71,1%.

V. Igikorwa cya gatanu kizibanda ku kuzamura imibereho

y’abagize umuryango.

Hazakorwa ibikurikira:

68. Abanyarwanda bose (100%) bazagezwaho amashanyarazi

bavuye kuri 34,5%. Leta ifatanyije n’Abikorera izakomeza gahunda yo

kongera ingufu z’amashyanyarazi no kuyakwirakwiza. Hazakoreshwa

n’uburyo butandukanye burimo n’imirasire y’izuba.

69. Abanyarwanda bose (100%) bazagezwaho amazi meza bavuye

kuri 85% (2017).

Ibi bizagerwaho:

 Hubakwa kandi hanasanwa imiyoboro y’amazi yo mu Mujyi wa

Kigali, indi migi no mu cyaro;

 Hongerwa ingano y’amazi atunganywa ku munsi, akazava kuri

m3 182.120 akagera kuri m3 303.120.

70. Ibikorwa by’isuku n’isukura bizagera ku Banyarwanda bose

(100%) bivuye kuri 84%. Hazanashyirwaho uburyo buboneye bwo

gutunganya imyanda mu migi itandukanye ndetse no mu cyaro.

Bimwe mu bizitabwaho ni ibi bikurikira:

a. Mu nyubako zirimo iza Leta n’iz’ubucuruzi hazubakwamo

imisarani rusange;

b. Mu Mujyi wa Kigali hazashyirwaho ahantu hakusanyirizwa

hakanatunganyirizwa imyanda (Kigali Centralized Sewerage

System and Faecal Sludge Treatment Plant);

c. Ahantu hose hateganyirijwe kuzubakwa amazu azatuzwamo

abantu benshi hazashyirwamo uburyo bwo gutwara imyanda

buciriritse (Construction of Semi Centralized Sewerage

Systems);

d. Mu Turere twose hazubakwa ibimoteri rusange hanashyirweho

uburyo bwo gutunganya imyanda. 

71. Ku bufatanye n’Abikorera, umuyoboro mugari wihutisha

interineti (Broadband) uzegerezwa abaturage mu Gihugu hose.

Hazihutishwa kandi ikwirakwizwa n’ikoreshwa rya 4G mu Gihugu

hose n’ibikoresho byifashishwa mu gukoresha interineti (Smart

devices). Ibi bizatuma umubare w’abakoresha interineti kuri telefoni

zigendanwa ugera nibura kuri 47% uvuye kuri 28%.

72. Hazakomeza Gahunda yo gutuza Abanyarwanda neza

bavanwa mu tujagari no mu manegeka. Imiryango izimurwa mu

manegeka ni 10.209; naho igera ku 205.488 izoroherezwa kuva mu

tujagari. Kugira ngo ibi bizashoboke, hazongerwa imbaraga mu

guteza imbere gahunda yo kubaka amazu aciriritse. Hazanategurwa

uburyo bwiza bwo guteza imbere imiturire yo mu byaro. Bityo

umubare w’Abanyarwanda bazaba batuye ahantu habugenewe mu

cyaro uzazamuka ugere kuri 80% uvuye kuri 55,8% bo mu mwaka

wa 2014 (EICV4).

73. Ikigega cyo guteza imbere iyubakwa ry’amazu aciriritse

(Affordable Housing Fund) kizatangira gukora kinongererwe

ubushobozi. Ibi bizafasha Abanyarwanda gutura neza kandi mu

bushobozi bwabo. By’umwihariko, iki kigega kizafasha Abikorera

bazubaka amazu mashya menshi ku nguzanyo ihendutse, kandi

gifashe abazagura aya mazu kubona inguzanyo z’igihe kirekire kandi

ku nyungu ziciriritse.

74. Hazatezwa imbere imyidagaduro na siporo hagamijwe

kuzamura imibereho n’ubuzima bwiza ku Banyarwanda bose.

Abikorera bazashishikarizwa kugira uruhare mu kubaka no gucunga

sitade zitandukanye zirimo iya Gahanga, iya Ngoma, Bugesera na

Nyagatare.

75. Hazongerwa imbaraga mu bikorwa byo gukumira no

guhashya ihohoterwa rishingiye ku gitsina n’irikorerwa abana.

Hazanozwa ubufatanye hagati y’Inzego za Leta, Abaturage ubwabo,

Inzego z’Abikorera, Sosiyete Sivile, Amadini n’Amatorero.

76. Hazongerwa imbaraga muri Gahunda yo kurerera abana

b’imfubyi mu miryango.

77. Hazakomeza kunozwa ingamba zo kwitegura, kugabanya no

gucunga ibiza mu nzego zose z’iterambere. Hazibandwa ku nzego

z’ubuhinzi, ibikorwaremezo, uburezi, ibidukikije n’umutungo kamere,

iterambere ry’imigi, ikoranabuhanga, n’ubuzima.

 Nyakubahwa Perezida wa Sena,

 Nyakubahwa Perezida w’Umutwe w’Abadepite,

 Ba Nyakubahwa ba Visi Perezida b’Imitwe yombi,

 Ba Nyakubahwa Basenateri,

 Ba Nyakubahwa Badepite,

INKINGI Y’IMIYOBORERE

78. Muri uyu mwanya, ndagira ngo mbagezeho ibikorwa by’ingenzi

biteganyijwe mu nkingi ya gatatu irimo ibikorwa by’Imiyoborere.

79. Intego ni ugukomeza gusigasira no kunoza ibyiza dukesha

imiyoborere myiza n’ubutabera Igihugu cyacu kimaze kwimakaza

kugira ngo birusheho gushyigikira iterambere rirambye kandi

rihuriweho n’Abanyarwanda bose.

Hazibandwa kuri ibi bikurikira:

I. Igikorwa cya mbere ni ukongera imbaraga mu kwigisha

indangagaciro z’umuco nyarwanda kugira ngo zikomeze kuba

umusingi w’amahoro, ubumwe n’ubwiyunge.

Muri uru rwego:

80. Hazashyirwaho uburyo buhamye bwo kwigisha no kurinda

Ikinyarwanda n’indangagaciro z’umuco nyarwanda zigishirizwa

mu mashuri, mu miryango no mu matorero atandukanye.

81. Hazakomeza kwimakazwa ubumwe n’ubwiyunge mu

Banyarwanda.

Iby’ingenzi bizakorwa ni:

 Gushyira mu bikorwa Gahunda ya “Ndi Umunyarwanda”

n’iy’Abarinzi b’Igihango bizakorerwa mu Nzego z’Ibanze,

bizarushaho gushyirwamo imbaraga;

 Amatsinda y’Ubumwe n’Ubwuyunge azongerwa kandi agezwe ku

rwego rw’Umudugudu;

 Ibi bikorwa byose bizatuma igipimo cy’ubumwe n’ubwiyunge

kizamuka kigere kuri 96% kivuye kuri 92,5%.

82. Hazongerwa imbaraga mu guteza imbere uburinganire hagati

y’abagore n’abagabo kandi Abanyarwanda bazakomeza guhabwa

amahirwe angana. Hazakomeza kandi kwimakaza umuco wo

kuzamura abafite intege nke.

II. Igikorwa cya kabiri ni uguharanira ko u Rwanda rukomeza

kugira umutekano usesuye no kurinda umutekano

w’Abanyarwanda n’ibyabo.

Muri uru rwego, hazakorwa ibi bikurikira:

83. Hifashishijwe uruhare rw’abaturage mu kwicungira umutekano

wabo, hazanozwa kurushaho ishyirwa mu bikorwa ry’ingamba zo

gukumira ibyaha. Ibi bizazamura igipimo cy’ikizere abaturage

bafitiye Inzego z’umutekano, kive kuri 92,62% kigere nibura kuri

95%. Igipimo cy’uko abaturage bishimira umutekano wabo n’ibyabo

na cyo kizazamuka kigere nibura kuri 98,7% kivuye kuri 86,1%.

84. Hazongerwa imbaraga mu kubaka ubushobozi bw’inzego

z’umutekano zose kugira ngo zirusheho kuzuza neza inshingano

zazo. Ingabo z’Igihugu n’izindi Nzego z’umutekano zizakomeza kugira

uruhare mu bikorwa by’iterambere.

85. Mu rwego rwo gukumira no kurwanya ibyaha byambukiranya

imipaka, kurwanya icuruzwa ry’abantu n’ibiyobyabwenge n’ibyaha

by’ikoranabuhanga (Cyber Crimes), hazongerwa imbaraga mu

kunoza no kwagura ubufatanye n’izindi Nzego z’umutekano zo

mu Karere no bindi bihugu.

86. Inzego z’umutekano zose zizarushaho kwimakaza

iyubahirizwa ry’indangagaciro z’ubudasumbwa z’umuco

nyarwanda no gukunda Igihugu. Umuco wo kwigira, kwihesha

agaciro no gukomeza gushyira imbere inyungu z’Abanyarwanda

bizarushaho gushyigikirwa.

III. Igikorwa cya gatatu ni ugushyira imbaraga muri Dipolomasi,

Ububanyi n’Amahanga n’Ubutwererane hagamijwe gutsura

iterambere ry’u Rwanda n’iry’Afurika.

Muri uru rwego hazakorwa ibi bikurikira:

87. Hazashimangirwa ububanyi n’amahanga n’ubutwererane

buteza imbere ishoramari, ubukerarugendo no kwagura isoko

ry’ibikorerwa mu Rwanda.

88. Hazongerwa imbaraga mu bikorwa byo gushishikariza

Abanyarwanda batuye mu mahanga ubumwe n’ubwiyunge,

kwitabira gahunda z’iterambere ry’u Rwanda, gukomeza kurushakira

inshuti, no kwagura serivisi zihabwa Abanyarwanda batuye mu

mahanga.

89. Hazaharanirwa ubumwe bw’Abanyafurika n’iterambere ryabo

rishingiye ku bufatanye n’ubuhahirane biganisha ku kwigira no

kugira ijambo kwa Afurika mu ruhando rw’amahanga.

90. Hazongerwa imbaraga mu gutanga umusanzu mu guharanira

amahoro n’iterambere muri Afurika no ku Isi. By’umwihariko,

hazaharanirwa ko Abanyarwanda bari mu butumwa bw’amahoro

bakomeza kuba indashyikirwa.

91. Mu rwego rwo gukomeza gushyigikira ibikorwa bigamije

iterambere, hazashyirwaho uburyo bwo kumenyekanisha

umwimerere nyarwanda mu kwishakamo ibisubizo (Home Grown

Solutions).

VI. Ikindi gikorwa cy’ingenzi ni ukurushaho guha ingufu urwego

rw’ubutabera no kubahiriza amategeko.

Hakaba hateganyijwe ibikorwa bikurikira:

92. Hazanozwa ingamba zo kugabanya ibirarane by’imanza mu

nkiko.

93. Serivisi z’ubutabera zihabwa abaturage zizarushaho kunozwa

himakazwa ikoreshwa ry’ikoranabuhanga ryifashishwa mu rwego

rw’ubutabera. By’umwihariko, uburyo bwo gucunga no gukurikirana

amadosiye (Integrated Electronic Case Management System)

buzagezwa mu Nzego zose z’ubutabera kandi bukoreshwe neza.

94. Hazanozwa kurushaho uburyo bwo gutanga ubufasha mu

by’amategeko. Ibi bizatuma ubutabera burushaho kugera kuri bose

kandi n’ikiguzi cyabwo kirusheho guhenduka. Ni muri uru rwego

serivisi z’ubujyanama mu by’amategeko (Maisons d'Accès à la

Justice/MAJ) zajyaga zikorera ku rwego rw’Akarere zizajya zitangirwa

no ku rwego rw’Umurenge.

95. Mu gutegura amategeko, kuyavugurura no kuyahuza n’igihe,

hazibandwa ku mwihariko w’umuco nyarwanda. Amategeko yose

azasesengurwa kugira ngo agomba kuvugururwa avugururwe kandi

amategeko mpuzamahanga 50 akoreshwa mu Rwanda azahuzwa

n’amasezerano mpuzamahanga u Rwanda rwasinye.

96. Mu rwego rwo gukemurira ibibazo mu muryango no kwimakaza

imikemurire y’amakimbirane n’imanza hagamijwe gushyigikira

imibanire myiza, hazanozwa uburyo bwo gukemura ibibazo

bitagombye ko habaho kwiyambaza inkiko. Biteganyijwe ko imanza

zicibwa n’Abunzi zizagera nibura kuri 94% zivuye kuri 86%. Ikindi

kizakorwa ni ukuzanoza uburyo bwo gucunga no guhanahana

amadosiye yo mu rwego rw’Abunzi (Abunzi Management Information

System).

97. Hazongerwa imbaraga mu gukumira no guhana ibyaha bya

ruswa. Bimwe mu by’ingenzi bizakorwa ni:

 Kongerera imbaraga Urwego rw’Umuvunyi kugira ngo rurusheho

gukurikirana no guhuza ibikorwa byo kurwanya no gukumira

ruswa mu Nzego zose za Leta;

 Kunoza uburyo bwo kurinda umutekano w’abatanga amakuru

ku batanga n’abakira ruswa;

 Abashinzwe gukurikirana amadosiye y’abakekwaho icyaha cya

ruswa no kunyereza umutungo w’Igihugu bazahabwa

amahugurwa yihariye azabafasha kurangiza neza akazi kabo;

 Hazongerwa imbaraga nyinshi mu kugaruza umutungo

w’abahamwe n’ibyaha byo kunyereza no kwangiza umutungo wa

Leta ku buryo igipimo cy’umutungo uzagaruzwa kizagera kuri

90% kivuye 44,3%. Bumwe mu buryo buzifashishwa ni

ukurushaho gukoresha abahesha b’Inkiko b’umwuga.

98. Hazongerwa imbaraga mu bikorwa byo kurwanya

ingengabitekerezo ya Jenoside mu Banyarwanda n’ahandi hose

igaragara.

Bimwe mu bizakorwa ni:

 Kurushaho gushimangira imibanire myiza ishingiye kuri

dipolomasi u Rwanda rufitanye n’Ibihugu byo mu karere

n’ibindi byo hirya no hino ku Isi, cyane cyane iyerekeranye no

gukumira no gukurikirana abakekwaho icyaha

cy’ingengabitekerezo ya Jenoside;

 Kurushaho kubika neza no kurinda ibimenyetso birebana na

Jenoside yakorewe Abatutsi mu 1994. Urugero ni nk’amadosiye

y’Inkiko Gacaca azaba abitswe yose (100%) hifashishijwe

ikoranabuhanga avuye kuri 77,8%.

V. Igikorwa cya gatanu ni ugukomeza kongerera Inzego zose za

Leta ubushobozi kugira ngo zirusheho gutanga serivisi nziza no

gucunga neza umutungo wa Leta.

Ibizakorwa muri uru rwego ni ibi bikurikira:

99. Inzego zose za Leta zizimakaza imiyoborere igamije kongera

umusaruro w’ibyo zikora no kongera ubushobozi bwo gutanga

serivisi nziza. Muri uru rwego, hazanozwa umuco wo guha

abaturage serivisi zihuse kandi nziza.

100. Serivisi zose (100%), zitangirwa mu Nzego za Leta zizajya

zitangwa hakoreshejwe ikoranabuhanga zivuye kuri 40% muri

2017.

101. Hazanozwa imitegurire n’ishyirwa mu bikorwa ry’imishinga

yose ya Leta hashyirwa mu bikorwa politike nshya y’ishoramari

rya Leta yemejwe na Guverinoma. Ibi bizarushaho kunoza iyi

mishinga kandi bitume n’ibyo yari igamije birushaho kugerwaho

neza.

102. Hazanozwa ihuzabikorwa n’imikorere y’amatsinda

atandukanye agamije iterambere ry’Igihugu n’Ihuriro

ry'Abafatanyabikorwa mu Iterambere (Joint Action Development

Forum/JADF) kugira ngo hanozwe kurushaho itegurwa n’ishyirwa

mu bikorwa ry’imishinga itandukanye.

103. Inzego za Leta zizarushaho gucunga neza umutungo

zishinzwe. Ibi bizatuma umubare w’inzego zibona “clean audit report”

uzamuka ugere kuri 70% uvuye kuri 32% (2015/2016). Bumwe mu

buryo buzifashishwa ni ukongera umubare w’abacungamari babyize

no kugeza ku nzego zose zirimo Imirenge, Ibitaro by’Uturere n’Ibigo

Nderabuzima ndetse n’Amashuri, uburyo bw’ikoranabuhanga

bukoreshwa mu gucunga umutungo wa Leta (Integrated Financial

Management System).

104. Uturere tuzongererwa ubushobozi bwo kongera amafaranga

twinjiza kugira ngo turusheho kubona ingengo y’imari yo gukora

ibikorwa by’iterambere tuba twateguye. Muri uru rwego, ibikorwa

by’iterambere byihariye bya buri Karere bizarushaho kwitabwaho.

Hazavugururwa kandi amategeko agenga imisoro n’amahoro

byeguriwe Inzego z’Ibanze.

VI. Igikorwa cya gatandatu ni ukongera uruhare rw’abaturage

mu kwitabira ibikorwa bigenewe kubateza imbere.

Ibikorwa by’umwihariko bizakorwa ni ibi bikurikira:

105. Hazubakwa kurushaho ubushobozi bw’Urwego rw’Abikorera,

Itangazamakuru, Imiryango itari iya Leta, Amadini n’Amatorero.

Ibi bizatuma izi Nzego zirushaho kugira uruhare mu iterambere

ry’Igihugu, kwimakaza imiyoborere myiza no guteza imbere imibereho

myiza y’Abanyarwanda.

106. Hazashyirwa ingufu mu kunoza ingamba zifasha abaturage,

cyane cyane abagore n’urubyiruko, kurushaho kugira uruhare mu

igenamigambi ry’ibikorwa by’ingenzi bitegurwa n’Uturere. Bumwe

mu buryo buzifashishwa ni ugushyiraho no gukoresha

ikoranabuhanga ritandukanye ririmo n’imbuga nkoranyambaga

kugira ngo birusheho guha abaturage urubuga rwo gutanga

ibitekerezo byabo.

107. Hazongerwa imbaraga mu guteza imbere umuco wo

guharanira kwigira mu Banyarwanda, gukorera hamwe no

kwishakamo ibisubizo ku bibazo bahura nabyo. Muri uru rwego,

Gahunda y’Urugerero ikurikiranwa n Komisiyo y’Igihugu y’Itorero

izongerwamo imbaraga.

108. Ibyiza tumaze kugeraho tubikesha kwishakamo ibisubizo no

guhanga ibishya bizakomeza gusigasirwa no kongerwa kugira ngo

birusheho kugira uruhare mu iterambere ry’abaturage no kubafasha

kugira imibereho myiza. Muri uru rwego, hazashyirwaho kandi hatangire

gukora, Ikigo cy’Itorero ry’Igihugu cy’Icyitegererezo cyo guteza imbere

umuco wo kwishakamo ibisubizo kugira ngo uzigishwe neza kandi ugirire

akamaro umugabane wacu n’Isi yose muri rusange.

 Nyakubahwa Perezida wa Sena,

 Nyakubahwa Perezida w’Umutwe w’Abadepite,

 Ba Nyakubahwa ba Visi Perezida b’Imitwe yombi,

 Ba Nyakubahwa Basenateri,

 Ba Nyakubahwa Badepite,

109. Ibi maze kubagezaho ni bimwe mu bikorwa by’ingenzi bigize

Gahunda ya Guverinoma muri iyi manda y’imyaka 7 (2017-2024).

Ishyirwa mu bikorwa ry’iyi Gahunda rizatuma dukomeza kubaka u

Rwanda twifuza kandi rudukwiye.

110. Kugira ngo iyi Gahunda izashyirwe mu bikorwa neza, birasaba

ubufatanye busesuye kandi buhoraho, hagati y’abagomba kuyishyira

mu bikorwa bose. Mboneyeho rero, gusaba Inzego zose za Leta,

iz’Abikorera, Sosiyete Sivile, Amadini n’Amatorero, Abafatanyabikorwa mu

Iterambere, Abanyarwanda aho bari hose, ndetse n’inshuti z’u Rwanda

kuzagira uruhare rugaragara mu ishyirwa mu bikorwa ry’iyi Gahunda.

111. Ku ruhande rwa Guverinoma y’u Rwanda, nejejwe no kubamenyesha

ko twafashe ingamba zo gukora igenamigambi rya buri mwaka ryo

kuyishyira mu bikorwa n’uburyo bwo kuyikurikirana. By’umwihariko,

Imihigo ikorwa n’Inzego zitandukanye ndetse n’itegurwa ry’ingengo y’imari

ya Leta bizajya bishingira kuri iyi Gahunda.

112. Mu gusoza, mu izina rya Guverinoma y’u Rwanda, nongeye

kubashimira Ba Nyakubahwa mugize Inteko Ishinga Amategeko, Imitwe

yombi, kubera uyu mwanya mwangeneye. By’umwihariko, Guverinoma

irabashimira uruhare rwanyu ruhoraho, mu gukurikirana no gutanga

inama z’uko Gahunda zitandukanye za Guverinoma zarushaho gushyirwa

mu bikorwa neza. Turizera tudashidikanya ko no kuri iyi Gahunda ya

Guverinoma y’imyaka irindwi (2017-2024), maze kubagezaho ari ko

bizagenda.

 

Murakoze,

Mugire amahoro y’Imana.


Copyright ©2017 MIFOTRA, All Rights Reserved