Minisitiri w’Abakozi ba Leta n’Umurimo Assoc. Prof. Jeannette Bayisenge yavuze ko imyitwarire mbonezamurimo igiye gukomeza kwigishwa mu nzego z'imirimo, izarushaho gushimangira Ndi Umunyarwanda. Yabivuze kuri iki cyumweru tariki ya 26 Gicurasi 2024, Mu kiganiro kuri Radio na Television Rwanda cyateguwe na MINUBUMWE ku bufatanye n’umuryango Unity Club.

Muri icyo kiganiro cyari gifite insanganyamatsiko igira iti “Ndi Umunyarwanda n’Umurimo” Minisitiri Bayisenge yavuze ko hari gutekerezwa uburyo Itorero ryaba umuco ndetse rigahoraho mu nzego z'imirimo, kuko ufite indangagaciro za Ndi Umunyarwanda anoza umurimo ndetse akaba intangarugero.

Yongeye kwitsa ku muco mwiza wo guhiga no guhigura mu nzego z'imirimo, agaragaza ko atari ibya none, ahubwo byahozeho, bityo ubumenyi no guhanga udushya bigomba guhuzwa n'umuco kugira ngo bizane ibisubizo biboneye.

Ashingiye ku ngero z'ibikorwa binini biri kugaragara hirya no hino mu gihugu, nko kubaka amazu n'amasoko, CHIC,MIC,GOICO, Minisitiri Bayisenge yagaragaje ko uyu ari umusaruro w'abumvise neza Ndi Umunyarwanda bagakorera hamwe bakubaka ibikorwa binini.

Ubu butumwa bwashimangiwe na Eric Mahoro Umunyamabanga Uhoraho muri MINUBUMWE waasabye ko Ndi Umunyarwanda ikwiye kuba 'style' y'ubuzima bwacu, yaba mu kazi no mu mibereho ya buri munsi, ibi bikaba byatuma twihutisha iterambere.

Wifuza gukurikira ikiganiro cyose wakanda hano