Kuwa 24 Werurwe 2017, Minisitiri w’Abakozi ba Leta n’Umurimo Judith Uwizeye, yasuye ibikorwa byo kwihangira imirimo mu Karere ka Nyamasheke mu Ntara y’I Burengerazuba, Ibikorwa biterwa inkunga binyuze muri gahunda ya NEP-Kora Wigire.
Kuri uwo munsi, Minisitiri Uwizeye aherekejwe n’Umuyobozi w’Akarere Kalima Aimé Fabien; ndetse n’abandi bayobozi b’Akarere ka Nyamasheke, basuye SACCO Kokasa yo mu Murenge wa Kanjongo, mu Karere ka Nyamasheke, imwe muri SACCO zikorana na NEP-Kora Wigire, ndetse inkunga yo gufasha ba Rwiyemezamirimo muri iyi gahunda yo kwihangira imirimo ikaba icishwa muri iyi SACCO.
Minisitiri w’Abakozi ba Leta n’Umurimo nyuma yo kugaragarizwa imikorere y’iyi SACCO yarayishimye, abasaba gukomeza gutanga inguzanyo nyinshi zifasha ba Rwiyemezamirimo b’urubyiruko n’abagore kwihangira imirimo bakiteza imbere muri gahunda ya Kora Wigire.
Minisitiri yasuye kandi Agakiriro ka Nyamasheke, ubusanzwe Agakiriro gakoreramo urubyiruko rurenga ijana, ariko hakaba hari abakozi bake bitewe n’ikibazo cy’umuriro wabaye muke muri ako Gakiriro gasanzwe gakorerwamo imyuga yo gusudira no kubaza.
Habyalimana Jovith; Umuyobozi ushinzwe iterambere ry’ubukungu mu Karere ka Nyamasheke, yemereye Minisitiri ko icyo kibazo cy’umuriro kizaba cyakemutse abakozi bakongera gukorera muri ako Gakiriro ari benshi bitarenze amezi abiri.
Nyuma yo gusura Agakiriro, Minisitiri w’Abakozi ba Leta n’Umurimo yasuye Uruganda ruciriritse rukora ibisuguti n’imitobe ruzwi ku izina ry’Agasaro, ashima imikorere y’uru ruganda n’uburyo rumaze kwiteza imbere.
Isabelle Uzamukunda; Rwiyemezamirimo ufite uru ruganda ruciriritse rw’Agasaro, yavuze ko uruganda rwabo rukora neza ndetse rwohereza ibicuruzwa byarwo mu Rwanda no mu bihugu birukikije, ariko bagifite imbogamizi yo kubona ibifunika ibicuruzwa byabo (emballage) kuko biva hanze bihenze.
Minisitiri Uwizeye yavuze ko icyo ari ikibazo rusange kuri ba Rwiyemezamirimo bakora ibikorerwa mu Rwanda, avuga ko azakiganira n’ababishinzwe ngo barebe uko cyakemuka.
Minisitiri Uwizeye yasoje uru rugendo ashima ibikorwa byo kwihangira imirimo muri aka Karere ka Nyamasheke, abizeza gukomeza kubafasha kwiteza imbere bihangira imirimo.