Kuwa 23 Werurwe 2017 Minisitiri w’Abakozi ba Leta n’Umurimo; Judith Uwizeye, yasuye Intara y’I Burengerazuba aho yaganiriye na ba Rwiyemezamirimo bakorera muri iyo Ntara, abibutsa kubahiriza Ingingo zikubiye mu Itegeko ry’Umurimo, ibiganiro byabereye mu Karere ka Karongi kuri uwo munsi.
Iyo nama nyunguranabitekerezo yari yitabiriwe na Guverineri w’Intara y’I Burengerazuba, Munyentwali Alphonse, ba Mayors bose bayobora Uturere turindwi tw’iyi Ntara (Karongi, Rusizi, Nyamasheke, Ngororero, Rutsiro, Nyabihu na Rubavu), Abayobozi b’Ingabo na Polisi muri iyi Ntara ndetse na ba Rwiyemezamirimo bakorera ibikorwa byabo muri iyi Ntara y’I Burengerazuba.
Ba Rwiyemezamirirmo bakorera muri iyo Ntara basaga 300, bari bitabiriye iyo nama ngishwanama, bashimiye Minisitiri w’Abakozi ba Leta n’Umurimo kuba yaje kwifatanya nabo, bamubwira ko bo bamaze gutera intambwe mu kubahiriza Itegeko ry’Umurimo, kuko batagikoresha abana imirimo mibi, gusa hari hake bikigaragara ariko bagiye kubibakangurira kubahiriza Itegeko ry’Umurimo.
Minisitiri Uwizeye yongeye kwibutsa ba Rwiyemezamirimo bo muri iyi Ntara, ko iyi Ntara irangwamo ubuhinzi bw’icyayi cyinshi ugereranyije n’izindi, abasaba kudakoresha abana mu busaruzi n’ubwikorezi bw’icyayi, ndetse anabasaba kutabakoresha mu mirimo mibi iyo ariyo yose.
Ba Rwiyemezamirimo  bakora ubucuruzi bw’icyayi bavuze ko gukoresha abana mu cyayi byagabanutse, ndetse biyemeza ko ahakigaragara abana bakoreshwa mu gusarura icyayi bagiye kubikumira bafatanyije n’Inzego z’ibanze.
Minisitiri w’Abakozi ba Leta yongeye kwibutsa abari bitabiriye inama ko Itegeko ry’Umurimo risobanutse, kandi utazajya yubahirizwa Ingingo zikubiyemo hari ibihano biteganyijwe bimuhana.