Ku cyumweru tariki ya 31,Nyakanga 2016,  Minisitiri w’Abakozi ba Leta n’Umurimo Judith Uwizeye, yifatanyije n’Abadivantisiti w’Umunsi wa karindwi babarizwa mu Mujyi wa Kigali, mu Muganda ngarukakwezi wabereye mu Karere ka Kicukiro, Umurenge wa Gikondo, Akagali ka Kinunga, Umudugudu wa Ruganwa 1, aho abantu benshi bakunze kwita mu Kanogo, Umuganda witabiriwe n’Abadivantisiti basaga 2,000.

Uwo muganda wibanze ku bikorwa byo  gutunganya ubusitani buherereye muri iki kibaya cyo mu Kanogo, Akarere ka Kicukiro, Umurenge wa Gikondo, ndetse no gutunganya igishanga kihegereye.

Umuganda  urangiye, habaye ibiganiro  byitabiriwe n’Abadivantisiti b’Umunsi wa Karindwi bo mu Mujyi wa Kigali bari bavuye mu Muganda, ibiganiro byabereye muri ubwo busitani, aho Abadivantisiti b’Umunsi wa Karindwi bibukijwe ko bagomba kwitabira Gahunda za Leta nk’abandi benegihugu bose, cyane cyane kuri uwo Munsi abadivantisti baganirijwe kuri Gahunda y’Ubwisungane mu Kwivuza (Mutuelle de Santé), gukosoza ibyiciro by’ubudehe ndetse no kuri gahunda ya Kora wigire izafasha u Rwanda mu guhanga imirimo 200,000 buri mwaka.
 
Minisitiri w’abakozi ba Leta n’umurimo Uwizeye Judith  yabwiye abitabiriye Umuganda ko kugura Mutuelle de Santé ari ukwiteganyiriza, kuko igihe cyose ufite Mutuelle de Santé adatungurwa n’uburwayi akabura amafranga amufasha kwivuza, ndetse anashima ko mu Muganda uheruka yari yabisabye Abadivantisiti bari bawitabiriye kandi abenshi bakaba barabikoze.

Minisitiri Uwizeye yasoje ibiganiro yagiranye n’Abadivantisiti b’umunsi wa karindwi abashimira ubwitange bagaragaza mu muganda, ndetse anabashimira uburyo kuri uwo munsi bari bitabiriye umuganda ari benshi, kandi ibikorwa byabo mu Muganda bigaragara ndetse bishimwa n’Inzego z’ibanze.

Minisitiri w’Abakozi ba Leta kandi yasabye Nsabimana Pascal; Visi Mayor w’Akarere ka Nyarugenge ushinzwe iterambere ry’ubukungu wari uhagarariye Mayor w’Umujyi wa Kigali utarabonetse, kujya bagaragaza muri raporo y’Umuganda n’ibikorwa Abadivantisiti baba bakoze mu Muganda.