Mu nama Nyunguranabitekerezo zabaye kuri uyu wa gatanu tariki 30/5/2025, mu ntara zose z’igihugu n’Umujyi wa Kigali zitabiriwe n’abasaga 2,000, baganiriye byimbitse ku ngamba zo guhanga imirimo inoze hagamijwe kugera ku ntego ya NST2 yo guhanga imirimo 1,250,000 hagati ya 2024 na 2029.

Dore zimwe mu ngingo zahuriweho ndetse bakiyemeza kuzishyira mu bikorwa. 

1. Gukangurira abikorera gutanga amahirwe ku rubyiruko rukeneye kwimenyereza no kwigira ku murimo (Workplace Learning Opportunities)
2. Uturere  tugiye kujya dusangiza amakuru Ibigo by'Amashuri Makuru  na Kaminuza ku mishinga minini ikorerwa mu Karere  hagamijwe guhuza igenamigambi kuri gahunda za igira ku murimo
3. Uturere twiyemeje gukomeza ibiganiro hagamijwe gukangurira urubyiruko kwihangira imirimo no kubafasha gutangiza imishinga ibyara inyungu, no kubafasha kugera ku gishoro.
4. Gukomeza gutegura ibiganiro ngaruka mwaka ku rwego rw'Akarere hagati y'Uturere, Abikorera n’abandi  bafatanyabikorwa mu ihangwa ry’umurimo, bigamije guhuza imbaraga no kungurana ibitekerezo ku kunoza no guhanga umurimo.
5. Abakoresha bazakangurira abakozi babo kugira umuco wo kuzigama no gushora imari ku isoko ry’imari n’imigabane kugira ngo bazagire ejo heza kandi bagire uruhare mu iterambere ry’u Rwanda.
6. Inzego z’abikorera ziyemeje kurushaho kubahiriza amategeko agenga umurimo, bikaba umuco kuko biteza imbere umusaruro w’ibigo byabo ndetse n’iterambere ry’abakozi babo. Ibipimo by’umurimo unoze bikurikira bigomba kuzamuka bikagera hejuru ya 60% biriho uyu munsi:

• Guha abakozi amasezerano y’akazi yanditse
• Guhembera abakozi kuri banki/ibigo by’Imari byemewe
• Guteganyiriza abakozi muri RSSB ⁠
• Kwirinda gukoresha abana imirimo ibujijwe
• ⁠Guteza imbere ubuzima n’umutekano ku kazi.

Minisiteri y’Abakozi ba Leta n’Umurimo nayo yiyemeje kuzakurikirana uko iyi myanzuro izashyirwa mu bikorwa.