Kuri uyu wa mbere abasaga 500 biganjemo abayobozi muri za Minisiteri, ibigo bya Leta, Abikorera, abayobozi ba sendika n' abakora mu bucukuzi bw’amabuye y’agaciro,  bahuriye i Rwamagana mu kigo cya Trinity Metals mu kwizihiza umunsi mpuzamahanga w’ubuzima n’umutekano ku kazi (OSH). 

Hapimwe indwara zitandura hagamijwe kureba uko ubuzima bw’abakozi buhagaze, hasurwa ibikorwa by’ubucukuzi bw’amabuye y’agaciro mu birombe bya Trinity Metals i Musha, ndetse hanagenzurwa uburyo abakora iyo mirimo bitabwaho bijyanye n’ubwirinzi n’umutekano mu kazi. 

Minisitiri Christine Nkulikiyinka agaruka kuri uyu munsi yagize ati “Mu gihe tuzirikana uyu munsi w’ubuzima bwiza n’umutekano ku kazi, ndagira ngo nibutse ko Insanganyamatsiko y’uyu mwaka igira iti “Healthy and Safe Workplaces: An Engine for Productivity” mu Kinyarwanda ikaba igira iti “Ubuzima n’Umutekano ku kazi: Ishingiro ry’Umusaruro”.

Yashimangiye ko iyi nsanganyamatsiko itwibutsa isano iri hagati yo guteza imbere ubuzima n’umutekano ku kazi n’umusaruro w’abakozi kandi iyo abakozi bamerewe neza banatanga umusaruro mwinshi kurushaho, bityo bikaba ari mu nyungu ya bose.

Minisitiri yanasabye abakoresha n’abakozi mu byiciro byose by’umurimo kurushaho kongera umusaruro bityo n’indi mirimo ikaba yahangwa nk’uko twabyiyemeje muri NST2.