Kuri uyu wa mbere tariki 15/7/2019,  Nyakubahwa Minisitiri w’Abakozi ba Leta n’Umurimo, RWANYINDO KAYIRANGWA Fanfan yatangije ku mugaragaro ibikorwa byahariwe ukwezi kwa Polisi (Police Month 2019) ku rwego rw’Intara y’Iburasirazuba mu Karere ka Ngoma abereye Imboni.

Icyo gikorwa cyabereye mu Murenge wa Sake, cyabimburiwe n'Umuganda wibanze ku  kubakira inzu umuturage utishoboye wo mu Mudugudu wa Nyarurembo, Akagari ka Rukoma, Umurenge wa Sake  no kubaka ibiro by'Umudugudu wa Nyagasozi, Akagari ka Rukoma, Umurenge wa Sake.

Mu bandi bayobozi bitabiriye icyo gikorwa hari Bwana MUFULUKYE Fred, Guverineri w'Intara y'Iburasirazuba, Umuyobozi Mukuru Wungirije wa Polisi DCG Juvenal MARIZAMUNDA, Abagize inama y'umutekano itaguye y'Intara y'Iburasirazuba n’Abayobozi b’Inzego z’Umutekano mu Karere ka Ngoma. 

Mu ijambo ry'ikaze, Umuyobozi w'Akarere ka Ngoma, Bwana NAMBAJE Aphrodise, yashimiye Polisi y’u Rwanda kuba yarategereje  gukorera mu Karere ka Ngoma ibikorwa bigamije iterambere ry'abaturage, asaba abaturage kubungabunga umutekano no kuzagira uruhare rufatika mu bikorwa byateganyijwe mu kwezi kwahariwe ibikorwa bya Polisi y’u Rwanda.

Umuyobozi Mukuru Wungirije wa Polisi DCG Juvenal MARIZAMUNDA, yavuze ko ibikorwa biteganyijwe kuva tariki 15/7/2019 kugeza tariki 14/8/2019 birimo  kubakira abatishoboye, kubaka ibiro by'Umudugudu, gutanga amashanyarazi aturuka ku mirasire y'izuba ku baturage, ubukangurambaga bugamije gukumira ibiyobyabwenge, ubukangurambaga bugamije gukumira gutera inda abana bato n'ihohotera rishingiye ku gitsina, kubungabunga ibidukikije, Gahunda ya Gerayo amahoro, asoza abasaba  kwirinda ibyaha bihungabanya umutekano birimo magendu, ikoreshwa ry'ibiyobyabwenge, ruswa, icuruzwa ry'abantu n’ibindi.

Bwana MUFULUKYE Fred, Guverineri w'Intara y'Iburasirazuba, yashimiye Polisi y’u Rwanda uruhare igira mu kurinda umutekano w'abaturage n'ibyabo, ibikorwa by'iterambere izageza ku baturage b'Intara y'Iburasirazuba  harimo ubwisungane mu kwivuza, umuriro ukomoka ku mirasire y'izuba,  asoza asaba abaturage kwitura Igihugu kuba abaturage beza batagira icyaha na kimwe.

Mu gusoza, Minisitiri  w'Abakozi ba Leta n'Umurimo,  Madamu KAYIRANGWA RWANYINDO Fanfan wari Umushyitsi Mukuru,  yashimiye Polisi y’U Rwanda  uruhare igira mu iterambere n'umutekano by'abaturage, asaba abaturage kwirinda ibyaha no gutanga amakuru ku gihe hagamijwe kubikumira bitaraba, ashimangira ko nta terambere n’imibereho myiza bishoboka ahari ibyaha kandi asaba buri wese kuba intangarugero ku bana no kubigisha  indangagaciro nyarwanda zirimo  gukunda Igihugu, gukunda umurimo no gutinya ikibi.