Kuri uyu wa 28 Ugushyingo 2018, Minisitiri w’abakozi ba Leta n’umurimo Rwanyindo Kayirangwa Fanfan, yafunguye ku mugaragaro ihahiro (shop) rizajya rigurisha ibikomoka ku buhinzi n’ubworozi, iryo hahiro rikaba ryatangijwe n’Ihuriro ry’urubyiruko rwagize umwuga ubuhinzi n’ubworozi rubyaza umusaruro ibibikomokaho  (Rwanda Youth in Agribusiness Forum /RYAF).[A1] 

Afungura ku mugaragaro iri hahiro , Minisitiri Rwanyindo yashimiye uru rubyiruko rwibumbiye muri RYAF kuba rwarakuye amaboko mu mifuka rugakora, rukihangira imirimo, rugamije kwiteza imbere.  

Minisitiri Rwanyindo yashishikarije urubyiruko gukomeza gukoresha amahirwe menshi Leta y’u Rwanda yarushyiriyeho binyuze muri National Employment Program (NEP) Kora Wigire,  harimo uburyo bwo kubona igishoro cyo gutangiza Imishinga y’Ubuhinzi (Agribusiness Investment Facility). Yanibukije kandi ko Inama y’Abaminisitiri yemeje Gahunda y’Igihugu y’Ubwishingizi bwo mu rwego rw’Ubuhinzi n’Ubworozi.

Minisitiri Rwanyindo yasabye RYAF ndetse n’abandi bakora ibijyanye n’ubuhinzi n’ubworozi gukomeza gushyira imbaraga mu kubikora kinyamwuga. .

Yagize ati “Ni ngombwa rero ko ibikorwa by’ubuhinzi turushaho kubiteza imbere no kunoza uburyo bikorwa, tukabikora kinyamwuga, kandi ikoranabuhanga mu buhinzi tugakomeza kuriteza imbere.RYAF mukomeje kuba umusemburo wo gukora ubuhinzi n’ubworozi kinyamwuga. Mukomereze aho. Ibyo bituma mugira uruhare rufatika mu guteza imbere Ibikorerwa mu Rwanda (Made in Rwanda) mu rwego rw’ubuhinzi n’ubworozi. Ndabashimira rero rubyiruko rwacu ko mwahinduye imyumvire kandi mukaba muri gufasha n’abagifite imyumvire itarahinduka, ikagenda ihinduka kuko hari abibwiraga ko ibikorwa by’ubuhinzi bitateza umuntu imbere, ariko ubu dufite ingero zifatika za ba Rwiyemezamirimo bakomeye mu Rubyiruko bamaze kwiteza kwiteza imbere mu buryo bw’icyitegererezo .”

Hategekimana Jean Baptiste, umuyobozi wa RYAF, nawe yashimiye Minisitiri w’abakozi ba Leta n’Umurimo kuba yaje kwifatanya nabo, ndetse yongera gushimira Leta y’u Rwanda kuba yarabateye inkunga kandi ikaba ikomeje kubaba hafi.