Kuri uyu wa Kane tariki 29 Ugushyingo 2018, Akarere ka Ngoma kateguye inama mpuzabikorwa  iba rimwe mu mwaka gatumiramo abaturage abafatanyabikorwa bako. Inama yabereye kuri sitade Cyasemakamba yiga kuri gahunda y’iterambere ry’Akarere mu  myaka irindwi (7) iri imbere n’ishyirwa mu bikorwa ry’imihigo y’umwaka wa 2018/2019. .

Inama yabanjjirijwe n’igikorwa cyo gusura hoteli y’icyitegererezo iri kubakwa mu Karere ka Ngoma, imirimo yo kubaka iyi hoteli ikaba iri hafi gusozwa.

Nyuma yo gusura ibikorwa byo kubaka iyo hoteli, abashyitsi n’abasangwa berekeje mu nama mpuzabikorwa baganira kuri gahunda y’iterambere ry’Akarere mu myaka irindwi (7) iri imbere no   ku ishyirwa mu bikorwa ry’imihigo ya 2018/2019 .

Bwana Nambaje Aphrodise,  Umuyobozi w’Akarere  ka Ngoma yashimiye abafatanyabikorwa bose bafasha Akarere mu kwesa imihigo no gutuma gatera imbere, bityo abasaba kongera ingufu mu bufatanye kugira ngo Akarere kazabashe kwesa imihigo kidashyikirwa.

Minisitiri w’Abakozi ba Leta n’Umurimo, Rwanyindo Kayirangwa Fanfan wari umushyitsi mukuru, yashimiye abitabiriye inama  bose ku bwitabire bwabo bushimishije no ku bitekerezo batanze.

Minisitiri Rwanyindo usanzwe ari n’imboni y’Akarere ka Ngoma, yashimye kandi  gahunda y’iterambere ry’Akarere mu  myaka irindwi (7) iri imbere , yongera gusaba ubuyobozi bw’Akarere n’abafatanyabikorwa bako kugerageza kwihutisha ishyirwa mu bikorwa ry’imihigo y’umwaka wa 2018/2019  ndetse abasaba no kuzaba  mu myanya y’imbere mu kwesa imihigo y’uyu mwaka.

Muri urwo rwego, Minisitiri Rwanyindo yasabye Akarere n’Abafatanyabikorwa gushyiraho uburyo buhoraho bwo kuganira ku Mihigo mu Nzego zose z’Akarere, gushimangira umuco wo kuzuzanya no kurangwa no kumvikana,  kwirinda gutekinika muri raporo zinyuranye zitangwa, guteza imbere umuco wo kungurana ibitekerezo no kubaka umuco wo gutanga serivisi nziza ku Baturage.

Yasabye kandi Akarere n’Abafatanyabikorwa bako mu iterambere  gukomeza gushyira ingufu muri Gahunda zose za Leta, by’umwihariko ubwisungane mu kwivuza, kurwanya inda ziterwa abangavu, guca burundu imirimo mibi ikoreshwa abana, kurwanya ihohoterwa rishingiye ku gitsina, guteza imbere gahunda mbonezamikurire ku bana no gushyira ingufu mu micungire myiza ya Gahunda zinyuranye zigamije imibereho myiza y’abaturage.

Minisitiri Rwanyindo yijeje Akarere ka Ngoma kuzakomeza kukaba hafi  ndetse abizeza kuzajya abasura buri kwezi,  anabasaba kuba Intaramanaguhiga nk’uko izina ry’Ubutore ryabo ribivuga, bagahora barangwa no guhiga no kwesa imihigo .