Kuri uyu wa 28 Ugushyingo 2019, muri Kigali Convention Center habereye umuhango wo guha Impamyabushobozi Urubyiruko 121 rurangije kwiga imyuga. Ni umuhango wayobowe na Bwana Gaspard MUSONERA, Umunyamabanga Uhoraho muri Minisiteri y’Abakozi ba Leta n’Umurimo wari Umushyitsi Mukuru ahagarariye Nyakubahwa Minisitiri w’Abakozi ba Leta n’Umurimo, Madamu RWANYINDO KAYIRANGWA Fanfan.

Mu rwego rwo guhangana n’ikibazo cy’ubushomeri mu rubyiruko, ibinyujije muri Minisiteri y’Abakozi ba Leta n’Umurimo, Guverinoma y’u Rwanda yashyizeho gahunda ya Igira Ku Murimo ifasha abahugurwa kubona ubumenyi buhagije bubafasha kwihangira imirimo,  aho bamara amezi atandatu (6)  bigira mu ishuri, andi mezi atandatu (6)  bakayamara bigira ku murimo. Iyi gahunda iterwa inkunga kanda igashyirwa mu bikorwa n’ Umushinga uterwa inkunga n’Ububiligi witwa APEFE.

Ku ikubitiro, iyi gahunda yahaye Impamyabushobozi urubyiruko 121 rurangije amasomo yarwo mu byiciro 3: Ubudozi, Ubwiza no Gutunganya Imisatsi, no Gutunganya umusaruro ukomoka ku Buhinzi n’Ubworozi. Uru rubyiruko rukaba rurangirije mu mashuri y’Ubumenyingiro 4 mu Gihugu ariyo Ngarama, Gacuriro, ESTB Busogo na Kabutare.

Mu buhamya bwatanzwe na bamwe mu barangije aya masomo, bagarutse ku gushimira Leta y’u Rwanda idahwema kubatekereza mu iterambere ry’Igihugu cyacu; bavuga ko iyi gahunda yabafashije cyane; bakiteza imbere, bakizigamira, abandi bakabona imirimo nyuma y’igihe kirekire ari abashomeri.

Mu ijambo rye, Dr. James Gashumba, Umuyobozi wungirije w’Ikigo cy’Ubumenyingiro, yavuze gahunga ya Igira ku Murimo ari ipfundo rishamikiyeho ibindi byinshi bizafasha mu gutanga impamyabushobozi ku muntu ushobora guhita atangira umurimo. Yongeyeho ko kurera no kwigisha bidakwiye gukorerwa mu ishuri gusa, ahubwo hakwiye ubufatanye hagati ya kaminuza, inganda n’abikorera mu rwego rwo gufasha abigisha mu mashuri y’imyuga kuba bazi kwigisha ariko bafite n’ubumenyingiro. Bwana Musonera Gaspard , Umunyamabanga Uhoraho muri Minisiteri y’Abakozi ba Leta n’Umurimo, yatangiye ashimira abafatanyabikorwa batandukanye ku ruhare rwabo mu kugenda neza kwa Gahunda ya Igira Ku Murimo.

Yavuze ko mu rwego rwo kugera ku ntego Leta y’u Rwanda yihaye y’uko kugera mu mwaka w’i 2024 hazahangwa imirimo 1,500,000 ibyara inyungu igatunga nyirayo, Leta y’u Rwanda yiyemeje guteza imbere ubumenyi bukenewe ku isoko ry’umurimo, binyuze mu gushishikariza Abanyarwanda kwitabira amasomo y’Ubumenyingiro bigira aho imirimo ikorerwa.

Yakomeje yibutsa urubyiruko rwarangije amasomo ko ubumenyi ndetse n’ubushobozi ari magirirane. Yagize ati: “Ubumenyi ni ukuvuga ngo ushoboye gusubiza ikibazo isoko ry’umurimo rifite. Ntabwo umuntu aguha akazi kuko utagafite, umuntu aguha akazi kuko ugiye kumusubiriza ikibazo yari afite. Ndetse n’iyo wihangira imirimo, ntabwo ugenda ngo ugiye kwihangira imirimo ngo ukore icyo ubonye, ukora icyo abantu bakeneye, bashakaga, bashakiraga igisubizo. Ibyo birasaba ko uba ufite ubumenyi n’ubushobozi byo gutanga ibyo bisubizo”.

Mu butumwa yahaye urubyiruko kandi, Bwana Musonera yabasabye gukora umurimo unoze kandi utanga umusaruro. Yagize ati: Ubutumwa nifuza kubaha uyu munsi buroroshye cyane, ndizera ntashidikanya ko uyu munsi ari intangiriro nziza mu gushyira mu bikorwa ibyo mwize mu gukora umurimo unoze kandi utanga umusaruro. Ndasaba kandi gukorana umurava buri gihe mutekereza gukora ibyiza kandi neza kurushaho.”

Yasabye kandi urubyiruko guhora rwiga kuko kwiga bitarangira, aho yagize ati: “Munyemerere mbibutse ko kwiga bitarangira nk’uko nabivuze, isi irihuta, ihinduka buri munsi, isaba ibitandukanye n’ibyo isaba uyu munsi, ni ngombwa ko muhora mwibaza uko musubiza ibibazo by’ababagana”

Yarangije ashimira politiki idaheza irangwa muri gahunda ya Igira Ku Murimo, aho abafite ubumuga bwo kutumva no kutavuga batahejwe, bagahugurwa kimwe n’abandi. Anasaba abafatanyabikorwa gukomeza gushyigikira intambwe bateye kugira ngo iyi gahunda izakomeze kugera ku banyarwanda benshi.

Muri uyu muhango kandi hashimwe abafatanyabikorwa barimo Abayobozi b’ibigo iyi gahunda yatangiriyemo, Abayobozi ba sosiyete zakiriye abanyeshuri mu kwimenyereza umwuga, ndetse n’abahuguwe ku rurimi rw’amarenga mu rwego rwo gufasha abafite ubumuga bwo kutumva no kutavuga.